Archive for பெண்கள்

நான் ஏழை வீட்டுப் பிள்ளை.. கிடுகு வீட்டுக் கிள்ளை.

girl-propose-to-guy

நான் ஏழை வீட்டுப் பிள்ளை

கிடுகு வீட்டுக் கிள்ளை

கிட்ட வந்து தொட்டு நிற்க..

எடி நான் உனக்கு சரிவர மாட்டேன்…

 

ஏடும் எடுத்ததில்லை

ஏரெடுத்த அழுக்கும் கலைஞ்சதில்லை

ஏர்போட் ஏறி இறங்க

எடி நான் உனக்கு ஏற்ற ஆளாய் வரமாட்டேன்..

 

பாடமும் படிச்சதில்லை

பட்டமும் பெற்றதில்லை

பகட்டும் எனக்கு இல்லை..

எடி நான் உனக்கு ஒத்துவரமாடேன்..

 

நான் ஏழை வீட்டுப் பிள்ளை

கிடுகு வீட்டுக் கிள்ளை

கிட்ட வந்து தொட்டு நிற்க..

எடி நான் உனக்கு சரிவர மாட்டேன்…

 

****

 

வாசலில் வாடி நிற்கும் செவ்வரத்தை நான்

மடி மீது ஊஞ்சல் கட்ட

மாதுளை உனக்கு மன்னன் மகனும் அல்ல

எடி நான் உனக்கு என்றும் தோதாய் வரமாடேன்

 

காவல் காக்க நான் நாயும் இல்லை

உன் காலடி சுற்றிவர பூனையும் இல்லை

கட்டிலில் கிடக்க தவிக்க நான் தலையணையுமில்லை

எடி நான் உனக்கு ரெடிபயராய் கூட வரமாட்டேன்..

 

நான் ஏழை வீட்டுப் பிள்ளை

கிடுகு வீட்டுக் கிள்ளை

கிட்ட வந்து தொட்டு நிற்க..

எடி நான் உனக்கு சரிவர மாட்டேன்…

 

****

 

எட்ட நில்லு கண்ணே

கண்ணோடு கண் மட்டும் வைச்சுக்கலாம்

கிட்ட வந்து என்னை கிஸ் அடிக்க

எடி நான் கெட்டவன் ஆகவும் வரமாட்டேன்..

 

முத்தும் இல்லை முல்லையும் இல்லை

பத்தும் இல்லை பதவியும் இல்லை எனக்கு

பறந்தாலும் நான் ஊர்குருவி பருந்தாகவும் இல்லை

எடி நான் உனக்கு ஏத்த ஜோடியாய் வரமாட்டேன்..

 

நான் ஏழை வீட்டுப் பிள்ளை

கிடுகு வீட்டுக் கிள்ளை

கிட்ட வந்து தொட்டு நிற்க..

எடி நான் உனக்கு சரிவர மாட்டேன்..

 

****

 

பாட்டாய் படிச்சுப் பார்க்கிறியோ

கவிதையாய் கிசு கிசுத்துக் கிழிக்கிறியோ

உனக்கு பொழுதுபோக்க

எடி நான் நல்ல பொழுதாய் வரமாட்டேன்..

 

கிட்ட வந்து எட்டப் போக நிலவரம் இல்லை

நிலவாய் எப்பவும் எட்ட நில்லு பெண்ணே

எட்ட நினைக்கும் மேகமாய்

ஏமாந்து குளற நான் ஏமாளியாயும் இல்லை

எடி நான் குற்றம் சுமக்க கூட வரமாட்டேன்..

 

நான் ஏழை வீட்டுப் பிள்ளை

கிடுகு வீட்டுக் கிள்ளை

கிட்ட வந்து தொட்டு நிற்க..

எடி நான் உனக்கு சரிவர மாட்டேன்..!!!

Advertisements

Leave a comment »

கப்பல் என்று நினைச்சன்.. கவுத்துப் போட்டியேடி.

boat

கரை தேடும்

கட்டெறும்பாக

வாழ்கைக் கடல் மீது

நம்பிக்கையோடு கரைசேர

நான் மிதக்க

இடையில்…

அலை மீது

துரும்பாக

எனைக்காக்கும் கப்பலாக

நீ வந்தாய்.

காதல் எனும்

கயிறு போட்டு

தொற்றிக் கொண்டேன்

உன்னிடத்தில்.

 

நீயோ…

பத்திரமாய் எனை

கரை சேர்ப்பாய் என்றிருக்க

காதல் கசந்ததென்று..

நடுக்கடலில்

தள்ளிவிட்டாய்.

பரிதவித்தே

போனேனடி.

நம்பிக்கை தகர்ந்து..!!

 

ஈவிரக்கம் இல்லாதவளே

உன்னை ஓர் நாள்

கடல் நடுவே

திமிங்கலம் ஒன்று

கவிழ்க்குமடி…

அப்போதும்

கட்டெறும்பாய்

நான்..

அலை மீது

உனக்கு உதவிடுவேன்

நிச்சயம்

பழிவாங்கேன்..!

அது உன்னுடன்

காதலுக்காய் அல்ல

என்னுடன்

உள்ள ஜீவகாருணியத்திற்காய்..!

 

(படத்துக்காய் ஓர் வரி.)

Leave a comment »

பார்ட்டிக்கு போய் ஓவரா தண்ணி அடிச்ச கடவுள்..

g1

கடவுள்

ஓர் நாள்..

பார்ட்டிக்குப் போய்

ஓவரா தண்ணி அடிச்சிட்டு

கட்டிலில் வீழ்ந்தவர்..

காலையில் எழுந்து

கண் விழிக்க

சிந்தனை கொஞ்சம்

சிக்கல்பட்டது.

சரி போனாப் போகுது

இப்படியே விட்டால்

மூளை குழம்பிடும்..

பொழுதும் போகுதில்லை..

ஒரு மானிடப்

பெண்ணைப் படைக்க

சித்தம் கொண்டார்..!

 

சித்தம் கொண்டவர்

டிகிரி போல்டரை

தூக்கினார்.

பெண்ணைப் படைக்க..

எனக்கு

என்னென்ன தகுதி வேணும்

செக் பண்ணத் தொடங்கினார்..

 

முதலில்

நல்ல ஸ்கெச் போட

ஒரு வரைகலை டிகிரி வேணும்..

சா.. அதுக்கு முன்னம்

நல்ல மனோதத்துவ டிகிரி வேணும்..

நோ நோ….

அதுக்கும் முன்னம்

நல்ல சமூகவியல் டிகிரி வேணும்..

ம்ம்ம்… இல்லையே

இவை மட்டும் இருந்தால்

வெறும் காட்டூன் தான் வரையலாம்..

உயிரை ஆக்க..

நல்ல உயிரியல்தொழில்நுட்ப டிகிரி வேணும்

 

அதுக்கும் மேல..

அளவுகள் எல்லாம் சரியாக் கணிக்க

நல்ல.. கணித டிகிரி வேணும்..

அது மட்டும் போதுமா

நினைப்பதை எல்லாம் பதிவு பண்ண

நல்ல கணணி டிகிரி வேணும்…

கணணியில் பதிவதை எழுத

நல்ல மென்பொருள் டிகிரி வேணும்..

 

என்ன இன்றைக்கு

சிந்தனை சுற்றிச்சுற்றி

சுப்பற்ற கொல்லைக்க நிற்குது..

அடிச்ச சரக்கில

எதையோ கலந்திட்டாங்கள் போல..

ம்ம்ம்….ம்ம்ம்

ஆஆஆஆ

உயிரை படைச்சு.. தகவலை பதிஞ்சா போதுமா

அதுக்கு உருவம் கொடுத்து

உலவா விட வேண்டாம்…?!

 

அதுக்கு..

நல்ல இயந்திரப் பொறியியல் டிகிரி வேணும்..

இயந்திரம் படைத்தால் போதுமா

அதை இயக்க..

நல்ல இலத்திரனியல்.. மின்னியல் டிகிரி வேணும்..

அது மட்டும் போதுமா..

அது கதைக்கப் பேச வைக்க

கேட்க உணர வைக்க

நல்ல தகவல்பரிமாற்ற தொழில்நுட்ப டிகிரி வேணும்…

 

உவ்வளவைவையும்

என்ன.. என் மண்டைக்க உள்ள

களிமண்ணையே

வைச்சுச் செய்யுறது..??!

மடையா மடையா

நீ எல்லாம் கடவுள்..!

 

செய்ய நல்ல…

செய்பொருள் வேணும்

அதற்கு நல்ல இரசாயனவியல் டிகிரி வேணும்..

இரசாயனத்தை ஆக்க

நல்ல பெளதிகவியல் டிகிரி வேணும்..

அது என்ன

சும்மா

buy one get one free யாவா கிடைக்கும்…

அதுக்கு முதலில

எனக்கு..

நல்ல மூளை வேணும்.

அதுக்கு நான்

இராப்பகலாப் படிக்கனுமே..!

கஸ்டம் தான்..

இப்படி தண்ணி அடிச்சிட்டு திரியுறதிலும்

மனம் வைச்சால் படிக்கலாம்.

 

படிச்சு எனக்கு

நல்ல மூளை வந்திட்டா..

அதையே கொப்பி பண்ணி

அங்கையும் வைக்கலாம்.

ஆனால் என்ன

நம்ம மூளை

அதுங்களுக்கும் வந்திட்டால்..

நம்மைத் தேடி வந்து

தொல்லை தருங்கள்..!

சோ….

கொஞ்சம் குறைச்சு வைப்பம்.

 

மூளை வைச்சா

கதைச்சுப் பேச ஆசை வரும்..

கதைச்சு பேசினால்

பிரச்சனை வரும்..

அதைத் தீர்க்க

நல்ல வக்கீல் டிகிரி வேணும்..

அப்பாடா..

இதோட முடிஞ்சுதா

இல்ல…

இன்னும் ஏதாவது..?!

 

ஆமால்ல..

பெண்ணைப் படைச்சால்

மட்டும் போதுமா

அது ஆட்டிப்படைக்க

ஒரு பொம்மை செய்யனுமே

அதுக்கு…????!

நல்ல குளோனிங் டிகிரி வேணும்.

குளோனிங் செய்ததை

குட்டி போட வைக்க

பாலியல் டிகிரி வேணும்.

பேசாமல்

அதை ஒரு ஆணாகப் படைப்பம்.

 

ஆணைப் படைச்சால்

குடும்பம் வரும்..

குடும்பம் வந்தால்

கிழிஞ்சுது கிருஷ்ணகிரி..

அதுகள் பெருக வெளிக்கிடும்.

பெருக வெளிக்கிட்டால்

வாழ இடம் கேட்கும்

அதை ஆக்க

நல்ல புவியியல் டிகிரி வேணும்.

 

இடம் கொடுத்தால்

மடம் புடுங்குங்கள்

அதைக் குறைக்க..

நல்ல மதத்தை வேற படைக்கனும்

அதுக்கு நல்ல மத டிகிரி வேணும்..

மதத்தைப் படைச்சால்..

அதைப் பரப்ப..???!

நல்ல மொழி வேணும்

அதுக்கு மொழி டிகிரி வேணும்.

 

மொழியை வைச்சால்

பாடம் படிக்குங்கள்

அதுக்கு நல்ல ஆசிரியர் டிகிரி வேணும்..

பாடம் படிச்சால்

பகுத்தறிவு வரும்..

பகுத்தறிய வெளிக்கிட்டால்

நான்.. நீ சண்டை வரும்

சண்டை வந்தால்

போர் வரும்.. அழிவு வரும்..

நோய் வரும்.. காயம் வரும்

உதுகளை கட்டுப்படுத்த

நல்ல மருத்துவ டிகிரி வேணும்.

 

அப்புறம்..

ஆளையாள் அடிபட்டு

செத்துப் பிணங்களாகுங்கள்.

பிணங்களைக் கூட்டி அள்ளி

உக்க வைச்சு..

recycle பண்ண

அதுக்கு தனி டிகிரி வேணும்..

 

அதுமட்டுமா..

ஆசையோடு வாழ்ந்தது

பிணமாய் போனால்

சும்மா இருக்குமா

பேயா சுத்தும்.

அதை அடக்க

சொர்க்கம் வைக்கனும்

அதுக்கு  நிறைய நிதி வேணும்

நிதியை கொண்டு வர

உற்பத்தி வேணும்.

உற்பத்தி பெருக..

நல்ல முகாமைத்துவம் வேணும்..

உதுக்கெல்லாம்

நல்ல ஒரு எம் பி ஏ டிகிரி வேணும்..

 

இப்படியே

டிகிரியை

கணக்குப் போட்டுக் கொண்டே போனால்

பெண்ணைப் படைக்க ஏலாது..

ஏதோ உள்ளதை வைச்சு

ஒன்றைப் படைப்பம்..

நடக்கிறது நடக்கட்டும்.

 

நல்ல ஐடியா..

பேசாம..

உள்ளதை வைச்சு

ஒன்றைப் படைச்சு

பூமில போட்டு விடுவம்

நடக்கிறதை

அப்புறம் பார்ப்பம்..!

 

தெரிந்தோ தெரியாமலோ..

பெண்ணைப் படைச்சு

பூமில போட்ட கடவுள்

களைப்பாற

கொலிடே போனவர் தான் போனார்.

இருந்த நிம்மதியும்

தொலைத்து..

பூமிப் பக்கம்

வரவே மாட்டேன்னு

ஓரங்கட்டி

ஒளிச்சுத் திரிகிறார்..! :) :lol:

Leave a comment »

தீண்டத் தீண்டத் துடிப்பவளே… நோண்ட நோண்ட நெருங்குபவளே..!

தீண்டத் தீண்டத் துடிப்பவளே

நோண்ட நோண்ட நெருங்குபவளே

தொடுகை எனும் மந்திரத்தால்

தூரம் எனும் இலக்கை தகர்ப்பவளே..!

அழகு முகம் காட்டி

உடல்தனை வருடத் தருபவளே

சுகிப்பின் களிப்பில்

சூடாகிச் சிணுங்குபவளே..!

அணைப்புத் தப்பினால்

அலங்கோலம் ஆகி நிற்பவளே..!

 

தொடாமல் நானிருக்க

விரதம் கொள்ளத் தூண்டுபவளே

கொண்ட கொள்கை நீளாமல்..

சிணுங்கி அழைத்து

சில்மிசத்தில் சிக்க வைப்பவளே..!

மணிகளை வினாடிகளாக்கி

இனிய பொழுதை

நொடியில் விழுங்குபவளே..

நீ இன்றிய தருணங்கள்

நினைச்சும் பார்க்க முடியல்லையடி..!

 

எட்ட நின்றாலும்

கிட்ட வந்து சட்டைப் பையில்

அடங்கி விடும் அழகினவளே

நீ ..சட்டென்று

தொலைந்து விட்டால்

பதைபதைக்குமே மனசு..!

பெற்ற இடத்தில்

சொல்லாத ரகசியம்

உன்னிடத்தில் சொல்லி வைப்பேன்

கடவுளை விட கண்ணியமாய்

காத்து அருள்புரிபவளே..!

களவாக எனை

உளவுக்கும் காட்டிக் கொடுப்பவளே..!

 

மாத இறுதி என்றால்

வந்திடும் சம்பளத்தில்

பாதி புடுங்குபவளே

காட்(card)டின்றி  போனால்

காட் (heart) இன்றி

போகவும் துணிந்தவளே..

ஆனாலும் நீ

விபச்சாரி அல்ல.

சொந்தம் என்று கொண்டு விட்டால்

ஆயுட்காலம் முடியும் வரை

ஒட்டிவிடும் உன்னதமானவளே..!

நீ.. கள்ளக் காதலியோ

இடைநடுவில் காய்வெட்டும்..

பொய்யான காதலியோ அல்ல..!

 

சிம் என்று சட்டையிட்டால்

அப்ஸ் என்று அழகுகளால்

அடுக்கடுக்காய்

கடை விரிப்பவளே..!

கவர்ச்சியின் நாயகியே – நீ

கண்ணடித்தால்

காளையரென்ன

அகில உலகமே

உன்னில் அடங்குமடி..!

இருந்தும்..

கலியாணம் கட்டு என்று

நச்சரிக்காத நங்கையடி நீ எனக்கு..!

 

சின்னவரோ பெரியவரோ

கவர்ந்திழுக்கும் மந்திரம்

பொதிந்தவளே

இணைய உலகில்

உன் இனிய மொழியால்

இதயங்கள் இணைப்பவளே..

அலைபேசியாய் அலைபவளே

பஞ்சமில்லாத பட்டப்பெயர்கள்

உனதாக்கி..

ஆண்டுக்கு ஒருதடவை என்றாலும்..

அவனியில் நீ

அழகுநடை போடுவாய்

கூட்டமெல்லாம் கியூவில் நின்று

முட்டி மோதுது

உன்னை தொட்டு அணைக்க…!

இருந்தாலும்

நீ எனக்கு சொந்தமானாய்

அமேசனில்

நான் செய்த டேட்ரிங்கை ஏற்றே..!

அன்பான என்

ஐபோனே … அன்பு முத்தங்கள்…! :)

 

ஆக்கம் நெடுக்ஸ். திகதி:11.12.13

நன்றி யாழ்.

Leave a comment »

உதிர்ந்த பல பூக்களில் ஒற்றைப் பூ இசைப்பிரியா..!

Issaipriya2

 

ஆரியச் சக்கரவர்த்தி

ஆசோகனின் காடைக் கடையன்

விஜயன் பரம்பரையில்

உதித்த சிங்கள தேசத்தில்

50 களில்

தமிழ் பெண்கள் மார்பறுத்து

கொதி தார்  ஊற்றி…

அனல் தணல் மீது விட்டெறிந்து

கொடுமை செய்து..

கூடி நின்று கேலி செய்து

வெற்றிக் கோசம் போட்டு

மகிழ்ந்த கூட்டம்…

83 இல்

அதையே அகலப்படுத்தி

தமிழச்சிகள் சேலை களைந்து

மானபங்கப்படுத்தி

தமிழர் குடியையே

ஆடை இன்றி விரட்டி அடித்து

மகிழ்ந்து நின்று..

மகாவம்சம் வழி

வீரம் பேசிக் கொண்டது.

 

அந்தக் காடைக் கழுதைகளை

காட்டேரிகளை..

இராணுவம் என்ற பெயரில்

உலக நாடுகள்

அள்ளி வழங்கிய

கொலைக்கருவி கொடுத்து

தமிழர் பகுதிக்கு

அனுப்பி வைத்தான் ஜே ஆர்..!

 

ஒப்பரேசன் லிபரேசன் முன்னாடி

தொடங்கி

ஒப்பரேசன் லிபரேசனில்

தமிழ் பெண்கள் வீடு புகுந்து

சீரழித்தது வரை

அது தொடர்ந்தது தொடர்கதையாய்..!

தமிழ் கணவான் அரசியல்வாதிகளும்

வட்டம் என்றும் சதுரம் என்றும்

குந்தி எழும்பி

கூடித் தின்று.. முடித்தார்

கூட்டுக் கதை..!

 

அன்னை இந்திராவின்

புதல்வனும்

பத்தாக்குறைக்கு

அனுப்பி வைத்தான்

ஹிந்திய ஜவான்களை..!

சிங்களம் விட்டதை

தொட்டுத் தொடர்ந்து

முடித்துவா.. காட்டிவா

அசோகனின்

ஆரிய வீரத்தை

தமிழ் பெண்டிரிடம் என்றிட…

ஏவல் படையும்

ஆயிரக்கணக்கில்

தமிழ் பெண்கள்

கற்புத் தின்று

ஏப்பம் விட்டு வெளியேறியது..!

கணக்கில் காட்சியில்

அவை அடங்காததால்

உண்மைகளை ஊமையாக்கும்

கேடுகெட்ட ஜனநாயக உலகில்

அமுங்கிப் போயின சாட்சிகள்..!

 

மீண்டும்..

சிங்களம் முறுக்கேறி

முற்றாக

முடித்துக் கட்ட தொடங்கியது

விட்ட இடத்தில் தொடர்கதை..!

பிரேமதாச.. டிங்கிரி பண்டா

என்று போய்..

சந்திரிக்கா அம்மையார்

செம்மணியில் வைத்து

பள்ளி மாணவி

கிருசாந்தி என்ற மகளை

வெட்டை வெளியில்

துகில் உரிந்தார்… தொடக்கி வைத்தார்

தொடர் நாடகம்..!

அந்த வரிசையில்

வந்த பலரில்..

சகோதரி கோணேஸுவரியை

காடைக்கும் கைக்குண்டிற்கும்

பலியிட்டார்..!

போதாக்குறைக்கு

ஒட்டி நின்ற ஒட்டுக்குழு

ஓநாய்களும் பங்கு பிரிச்சு

சொந்தச் சகோதரிகள் உடை கிழிக்க..

பொத்துவில் தொடங்கி

தொண்டமனாறு வரை

ஊரே வன்புணர்வில்

அல்லோல கல்லோலப்பட்டது..!

 

இறுதில்

மகிந்த வந்தான்

தம்பி பரிவாரங்களுடன்..!

வாகரையில் தொடங்கி

முள்ளிவாய்க்கால் வரை..

தமிழ் பெண்கள்

சிங்களப் படைகளின்

இச்சைக்கு விருந்து..

பப்ளிக்காச் சொல்லி

படையல் செய்தார்கள்..!

அந்தச் சுழலில்

சிக்கிச் சீரழிந்த

பல்லாயிரம் பூக்களில்

ஒற்றைப் பூத்தான்

எங்கள் இசைப்பிரியா..!

 

அவளே

65 ஆண்டு கால

இன அழிப்பில்

மெளனமாகிப் போன

பெண்ணியப் பொய்யர்களின்

கூட்டுக் குதூகலிப்பில்..

தமிழ் பெண்களின்

கொடு நிலைக்கு

பதியப்பட்ட

காணொளிச் சாட்சியாகியும் உள்ளாள்.

 

காணாமல் போன

காட்சிகள் சாட்சிகள்

மறந்து மறைத்து

மீண்டும் கணவான் அரசியல்

சித்தர்கள்

முணுமுணுக்கின்றார்..

சிங்கள “ஜனாதிபதி “

விசாரிக்க வேண்டுமாம்..!

ஏதோ விசாரித்து

நீதியும் தர்மமும் நிலைநாட்டிய

கணக்கில் வெட்டிக் கதையளப்பு..!

கண்கெட்ட பாதகர்கள்

இவர்களே

இத்தனை கொடுமைகளும்

தொடரக் காரணம்..!

தன் மகளும்

தர்ம பத்தினியும்

பத்திரமாக வெளிநாட்டில்

என்ற திமிரில்

அவர்களுக்கு இது

பொழுதுபோக்கு.. அரசியல்..!

 

கேடு கெட்ட

மானுட உலகே..

இன்னும் என்ன வேண்டும்

சாட்சியாய்.. நீ நடவடிக்கை எடுக்க..???!

உண்மையைச் சொன்னால்..

இசைபிரியா என்ற பூவோடு

இந்தக் கதை முடியாது..!

காடைகள் கூட்டம்

கையில் அதிகாரமும் ஆயுதமும்

உள்ளவரை..!

அதைக் களையாமல்

இல்லை

மானுட உலகில்

உயிர்க்கும் மானத்திற்கும்

உரிமைக்கும்…

உத்தரவாதம்..!

 

Leave a comment »

யாரையடா விசாரிக்கக் கோருகிறாய்..??!

1996 இல்

சந்திரிக்காவின் வெற்றிக்கு

பள்ளி சிறுமியவள்

கிருசாந்தி என்ற பிள்ளையை

சிங்கள நாய்களுக்கு

பரிசளித்துக் கொன்றாயேடா

செம்மணியில்

அதைப் புதைத்தும் நின்றாயேடா

அன்றும் சாட்சியாய் நீயே..!!

 

வேலணையில்

வைத்திய சேவகியை  தாதியை

புங்குடுதீவில்

சாரதாம்பாள்,தர்மினியை

உன் காலடியில்

தின்று கொன்று

புதைக்க  கூட்டாகி

நின்றாயேடா

அங்கும் சாட்சியாய் நீயே..!

 

நெடுந்தீவுப் பூமகள்

லக்சினியை

இளஞ்சிட்டை

உன் சொந்தக் கூலியை

ஏவித் தின்று கொன்றாயேடா

நேற்றும் சாட்சியாய் நீயே..!

 

இப்படி..

ஆயிரம் ஆயிரம்

எம் தங்கைகளை அக்காக்களை

கண்முன்னே சீரழிதவன் நீ..

அங்கெல்லாம்..

மெளனம் காத்து

கொடூரருக்கு உதவி நின்றவன் நீ..

 

இசைப்பிரியா என்ற மகள்

அழிவதை சிதைவதை

வேடிக்கை பார்த்தவன் நீ

இன்று..

நீலிக்கண்ணீர் வடிக்கிறாய்

தின்றவனை

ஏப்பம் விடுபவனை

நீதி தருவான் என்று

நம்பச் சொல்கிறாய்..

அதிலும் சாட்சியாய் நீயே..!

 

சிங்கள

எசமான விசுவாச

விலங்கே

நீ இன்னும்

உயிர் வாழ்வதே

கேடடா இந்த மானுட உலகிற்கு..!

தொலைந்து போ

இன்றேல் ஊமையாய் போ..!

 

இழந்ததை மீட்க

மானம் உள்ளோர்

மனிதாபிமானம் உள்ளோர்

வருவாராடா – உன்

எசமானர் காலடி தேடி..!

காலம் ஓர் நாள்

நீதி தந்து

உங்கள் குரல்வளைக்கு

தீர்ப்பெழுதும்..!

 

[செய்தி: இசைப்பிரியா படுகொலை பற்றி ராஜபக்ச நீதியான விசாரணை நடத்த வேண்டுமாம்: டக்கிளஸ் தேவானந்தா என்ற சிங்களக் கூலி யாழ்ப்பாணத்தில் தெரிவிப்பு.]

Leave a comment »

விவாகரத்து.. உண்மையில் ஒரு நாடகம் தானே..!!

உடல் இரசாயனங்களின்

உந்துதலில்

உன்னைக் கண்டேன்.

உன்னதமாய் தோன்றிய

உன்னால் பைத்தியமும் ஆனேன் – கூடி

உலவவும் செய்தேன்..!

உயிர்மெய்யென

உன்னில் நானே

உளறியும் கொட்டினேன்.

உன்னை நீயே

உத்தமன் இவனென்று எனக்குத் தந்தாய்…!

 

உறவுகள் விரிந்தது

உண்மைகள் என்பதாய் வளர்ந்தது.

உடலும் உறவு கொண்டது

உயிர்களும் தோற்றம் பெற்றன.

உடைக்க முடியாத பந்தம்

உன் – என் உறவென்று

உறுதியாய் நம்பி இருந்தேன்

உன் அன்பை

உண்மை அன்பெனக் கண்டதால்.!

 

உறுத்தலாய்

உருண்டது ஓர் நாள்..!!

உன் முன்னவன் என்று

உதிரியாய் ஒருத்தனை

உதாரணம் காட்டினாய்.

உள்ளதில் படர்ந்தது

உதவாக்கரை எண்ணம்.

உன்னை அது

உறவால் வெறுக்க வைத்தது.

உறவுகள் விரிசல் காண…

உயிர்கள் அந்நியமாக

உடல்கள் பிரிந்தன.

 

உளலும் மனதில்

உருமாறிய நீ

உண்மையில் வேண்டாதவளானாய்

உணர்வுகள் அழித்து

உன்னை உதிர்க்கும் தருணமே

உளத்திற்கு அமைதி என்றானேன்..!

 

உலகம் பூராத் தேடி

உயிரால் உயில் எழுதி

உருப்படியாய் எடுத்த

உயிர் நீ யென்பதை

உடனடியாய் தூக்கி எறிந்தேன்.

உதறித் தள்ளினேன்

உன் நினைவுகளை…!

உடைந்த

உறவில் தேடினேன்..

உத்தமனாய்

உன்னைப் பிரிய ஒரு விவாகரத்து.

 

உரைகள் எழுதிய – நீதிமன்றின்

உதவியோடு

உன்னை என்னை அறியாதவன்

உத்தரவுக்கு அடிபணிந்து..

உன்னை வலிந்து விலக்கினேன்..!

உருவானது நிம்மதி என்று

உள்ளம் தேற்றினேன் – ஆனாலும்

உடலும்

உள்ளமும் கலந்தவள் நீ

உண்மை அது என்று

உள்ளம் உரைக்க

உன் நினைவுகள்

உன்னை விடுகுதில்லை

உன்னவனிடத்தில் இருந்து.

உறவுகள் அறுத்தவன்

உலைக்களம் ஏவிய

உதாரணமாய் ஆனான் விவாகரத்தால்…!

 

உண்மையில்

உற்ற உறவுகள்

உடலால்..

உள்ளத்தால் இணைந்த பின்

உருவாகும்

உறவது பிரிக்க இயலா இணைப்பு.

உலகில் அதை அறுக்க

உங்கு எவரும் இல்லை..!

உணர்ந்து கொண்டேன்

உண்மைகள் அறிந்து கொண்டேன்..!

உவளே என்

உயிர் என்றும்

உற்ற தோழி என்றும்

உறவுகள் தொடர்ந்தேன்.

உள்ளம் வாழ்த்த

உன்னை

உள்ளமெங்கும் என்னிடத்தில் தாங்கிய படி..!!

(விவாகரத்துக்கள் அதிகரித்து வரும்… இன்றைய நிலையில்… அண்மையில் மேற்படி பாடல்கள் இரண்டையும்..  பார்த்த போது மனதில் உதித்ததை இங்கு ஆக்கியுள்ளோம்.)

Leave a comment »